<div dir="auto" style="text-align: justify; ">നമ്മുടെ കുരുമുളക് ചെടിയുടെ കുടുംബക്കാരിയാണ് വെറ്റിലയും.പല ഇനങ്ങള് ഉണ്ട് വെറ്റില തന്നെ. ഔഷധഗുണത്തിലും ഇരുവരും ഒന്നിനൊന്നു മെച്ചം. വെറ്റിലയും അടയ്ക്കയും നമ്മുടെ സാമൂഹിക - മതാചാരങ്ങളില് ഒഴിവാക്കാനാകാത്ത ഘടകങ്ങളാണ്</div> <div dir="auto" style="text-align: justify; ">കേരളം പൊതുവെ വെറ്റിലക്കൃഷിക്ക് അനുയോജ്യമാണ്. നല്ല വളക്കൂറും നീര്വാഴ്ചയുമുള്ള മണ്ണാണ് നല്ലത്. ഭാഗികമായി തണല് ഇഷ്ടപ്പെടുന്ന ചെടിയായതിനാല് നമ്മുടെ തെങ്ങിന്തോപ്പുകളും കമുകിന്തോട്ടങ്ങളും ഇവയുടെ കൃഷിക്ക് നല്ലതാണ്.</div> <div dir="auto" style="text-align: justify; ">തുളസി, അരിക്കൊടി, കല്ക്കൊടി, വെണ്മണി, കരീലാഞ്ചി, ചെലന്തികര്പ്പൂരം, അമരവിള, കൊറ്റക്കൊടിനാടന്, പെരുങ്കൊടി എന്നിവയാണ് പ്രധാന ഇനങ്ങള്. പ്രദേശങ്ങള്ക്കനുസരിച്ച് ഇനങ്ങളോടുള്ള താത്പര്യവും വ്യത്യാസപ്പെട്ടിരിക്കും.</div> <div dir="auto" style="text-align: justify; ">മേയ് - ജൂണ് മാസത്തില് കൃഷിയാരംഭിക്കുന്ന ഇടവക്കൊടിയും ആഗസ്റ്റ് - സെപ്റ്റംബറില് കൃഷിയാരംഭിക്കുന്ന തുലാക്കൊടിയുമാണ് വിള സീസണുകള്.</div> <div dir="auto" style="text-align: justify; ">ആവശ്യത്തിന് തണലുള്ള സ്ഥലം കണ്ടെത്തി 75 സെന്റീമീറ്റര് വീതിയിലും ആഴത്തിലും കിളച്ച് പരുവപ്പെടുത്തണം. ഇതില് നന്നായി ഉണങ്ങിപ്പൊടിച്ച ചാണകവും പച്ചിലവളവും ചാരം എന്നിവ ചേര്ത്തിളക്കിയെടുക്കണം. വെറ്റിലയ്ക്ക് ജൈവവളം നല്ല അളവില് നല്കേണ്ടതുണ്ട്. ഇവയുടെ വേരുപടലത്തിന്റെ ശരിയായ വളര്ച്ചയ്ക്ക് ഇത് അത്യന്താപേഷിതമാണ്. ഇങ്ങനെ പരുവപ്പെടുത്തിയ തടത്തിലാണ് വെറ്റില വള്ളികള് നടേണ്ടത്</div> <div dir="auto" style="text-align: justify; ">രണ്ടുമൂന്നു വര്ഷം പ്രായമുള്ളതും കീട - രോഗ ബാധയേല്ക്കാത്തതുമായ വെറ്റിലക്കൊടിയുടെ തലപ്പ് ഒരു മീറ്റര് നീളത്തില് മുറിച്ചെടുത്ത് നടീലിനായി ഉപയോഗിക്കാം. രണ്ട് മുട്ട് മണ്ണിനടിയില് ഒരു മുട്ട് മണ്ണിനു മേല്ഭാഗത്തോട് ചേര്ന്ന് എന്ന തരത്തിലാവണം നടേണ്ടത്. മണ്ണ് നന്നായി അമര്ത്തിക്കൊടുക്കുകയും വേണം. തെങ്ങോല, കമുകോല എന്നിവകൊണ്ട് തണല് നല്കാം.</div> <div dir="auto" style="text-align: justify; ">നന്നായി നനയ്ക്കേണ്ടതുണ്ട്. രാവിലെയും വൈകുന്നേരവുമാണ് ജലസേചനത്തിന് നന്ന്. അമിത നന ഒഴിവാക്കണം.</div> <div dir="auto" style="text-align: justify; ">ഒരു മാസത്തിനുള്ളില് വള്ളികള് മുളച്ചു തുടങ്ങും. ഇതിനിടയില് പന്തല് നിര്മാണം തുടങ്ങിയിരിക്കണം. പന്തലിന് താങ്ങുകാലുകളായി കിളിഞ്ഞില്, പഞ്ഞിമരം, തഴപ്പായ ചെടിയുടെ മുട്ടുകള് എന്നിവ ഉപയോഗിക്കാം. ഇവയെ മുളക്കീറുകളും കയറുകളും ഉപയോഗിച്ച് പരസ്പരം ബന്ധിപ്പിച്ച് വേണ്ട ഉറപ്പുവരുത്തണം. ഈ പന്തലിലേക്ക് വള്ളികളെ പടര്ത്തി കൊടുക്കണം.</div> <div dir="auto" style="text-align: justify; ">ഉണക്കയില പൊടിഞ്ഞത്, ചാരം, ചാണക സ്ലറി എന്നിവ ഇടവിളകളനുസരിച്ച് തടത്തില് നല്കണം. കൊന്നയില, മാവില തുടങ്ങിയവ നല്കുന്നത് വളര്ച്ചയെ ത്വരിതപ്പെടുത്തും.</div> <div dir="auto" style="text-align: justify; ">മൂന്നാം മാസം മുതല് വിളവെടുത്തു തുടങ്ങാം. ആറാം മാസം മുതല് ശരിയായ വിളവ് ലഭിച്ചു തുടങ്ങും.</div> <div dir="auto" style="text-align: justify; ">എട്ടു ദിവസത്തിലൊരിക്കല് വിളവെടുക്കുന്നതാണ് നല്ലത്. ശരിയായ കണ്ണി പൊട്ടിയില്ലെങ്കില് വള്ളി ഇടയ്ക്ക് ഇറക്കി പതിയ്ക്കേണ്ടതുണ്ട്. സാധാരണഗതിയില് മൂന്നു മീറ്ററിനു മേല് വളര്ന്നുകഴിഞ്ഞാല് വളര്ച്ച മന്ദഗതിയിലാകാറുണ്ട്. ഇത് പരിഹരിക്കാനും വള്ളി ഇറക്കി പതിച്ചെടുക്കണം. ഓഗസ്റ്റ് - സെപ്റ്റംബര് മാസങ്ങളാണ് ഇതിന് അനുയോജ്യം.</div> <div dir="auto" style="text-align: justify; ">നീരൂറ്റിക്കുടിക്കുന്ന ചെറുപ്രാണികള്, ശല്ക്ക കീടങ്ങള് തുടങ്ങിയവ വെറ്റിലയെ ആക്രമിക്കാറുണ്ട്.</div> <div dir="auto" style="text-align: justify; ">മീനെണ്ണ, സോപ്പുമിശ്രിതം, ഇതര ജൈവകീടനാശിനികള് എന്നിവയുപയോഗിച്ച് കീടങ്ങളെ പ്രതിരോധിക്കാം</div> <div dir="auto" style="text-align: justify; ">തോട്ടത്തിലെ വൃത്തിയും പരമപ്രധാനമാണ് വെറ്റിലക്കൃഷിയ്ക്ക്</div> <div dir="auto" style="text-align: justify; ">എട്ടു ദിവസത്തിലൊരിക്കല് വിളവെടുക്കാം. വലുപ്പം, ആകൃതി, വൃത്തി എന്നിവയുടെ അടിസ്ഥാനത്തില് 30 വെറ്റിലകളെ കെട്ടുകളാക്കി വൃത്തിയുള്ള വാഴനാരില് കെട്ടിയൊരുക്കുന്നു. വെള്ളം നനച്ച് പച്ചവാഴയിലയില് എട്ടുദിവസം വരെ സൂക്ഷിക്കാനാകും. ഒരു വെറ്റിലയ്ക്ക് ശരാശരി രണ്ടു രൂപ വരെ നിലവിലുണ്ട്.</div> <div dir="auto" style="text-align: justify; ">ക്ഷമയും സഹനശേഷിയുമുള്ള കര്ഷകര്ക്ക് ധൈര്യപൂര്വം തെരഞ്ഞെടുക്കാവുന്ന പരിശുദ്ധ വിളയാണ് വെറ്റില.</div> <div dir="auto">അഹല്യ ഉണ്ണിപ്രവൻ</div>