<div id="MiddleColumn_internal"> <ul> <li style="text-align: justify;">கட்டிடங்களின் தரை ஒரு முக்கியமான அமைப்பாகும். கட்டிடத்தின் தரைப்பகுதியானது கால்நடைகள் நடக்கவும், படுக்கவும் இதர வேலைகளைச் செய்யவும் பயன்படுகிறது</li> <li style="text-align: justify;">எனவே கால்நடைக் கொட்டகைகளின் தரையானது, மேற்கூறிய வேலைகளைச் செய்ய ஏற்றதாக இருக்கவேண்டும்</li> <li style="text-align: justify;">கால்நடைக் கொட்டகைகளின் தரை கால்நடைகளின் கடினமான குளம்பு பகுதியின் அழுத்தத்தைத் தாங்குவதற்கு ஏற்றவாறும், கட்டிடத்தின் அதிக எடை வாய்ந்த கூரையைத் தாங்குமாறும் அமைக்கப்பட வேண்டும். தவிரவும் கால்நடைக் கொட்டகைகளின் தரை அமைக்க ஆகும் செலவு குறைவாகவும் இருக்க வேண்டும்</li> <li style="text-align: justify;">கால்நடைக் கொட்டகைகளின் தரை கால்நடைகளுக்கு சுகாதாரமான முறையில் தீவனம் அளிப்பதற்கும், கால்நடைகளின் திட மற்றும் திரவக் கழிவுகளை எளிதாக சுத்தம் செய்வதற்கு ஏற்ற வகையிலும் அமைக்கப்பட வேண்டும்</li> <li style="text-align: justify;">கால்நடைக் கொட்டகைகளின் தரை கடினமான மற்றும் திடமான அஸ்திவாரத்தின் மீது அமைக்கப்பட வேண்டும். தீவனத் தொட்டியிலிருந்து, சாணம் மற்றும் திரவக்கழிவுகள் செல்லும் கால்வாய் வரை 1/60 என்ற அளவில் சாய்வாக அமைக்கப்பட வேண்டும்</li> <li style="text-align: justify;">கால்நடைக் கொட்டகைகளின் தரை வழுக்கும் தன்மை அற்றதாகவும் இருக்க வேண்டும்</li> <li style="text-align: justify;">தரை சொரசொரப்பாகவும், கோடுகள் அமைக்கப்பட்டும் இருக்க வேண்டும்</li> </ul> <h3 style="text-align: justify;">கால்நடைக் கொட்டகைகளில் தரை அமைக்கப் பயன்படுத்தப்படும் பொருட்கள்</h3> <ul> <li style="text-align: justify;">சிமெண்ட் கான்கிரீட்</li> <li style="text-align: justify;">விட்ரிபைடு கற்கள்</li> <li style="text-align: justify;">கற்கள்</li> <li style="text-align: justify;">செங்கற்கள்</li> <li style="text-align: justify;">மணல்</li> </ul> <p style="text-align: justify;"><strong>i) சிமெண்ட் கான்கிரீட்</strong></p> <ul> <li style="text-align: justify;">கால்நடைப் பண்ணைகளில் சிமெண்ட் கான்கிரீட்டிலான தரை பொதுவாக அமைக்கப்படுகிறது</li> <li style="text-align: justify;">நன்றாக அமைக்கப்பட்டால் இவ்வகை தரை அமைப்பு நீண்ட நாட்களுக்கு தாங்கும் தன்மையுடையது</li> <li style="text-align: justify;">வெப்ப மண்டலப் பிரதேசங்களில் இந்த தரை அமைப்பு கால்நடைகளுக்குத் தேவையான குளிர்ந்த சூழ்நிலையினை உருவாக்குகிறது</li> <li style="text-align: justify;">விபத்தினைத் தவிர்க்க இந்த தரை அமைப்பு சொர சொரப்பாகவும், கோடுகளுடனும் அமைக்கப்பட்டிருக்க வேண்டும்</li> </ul> <p style="text-align: justify;"><strong>ii) செங்கற்கள்</strong></p> <ul> <li style="text-align: justify;">சில சமயங்களில் செங்கற்கள், தரை அமைப்பதற்கு பயன்படுத்தப்படுகின்றன</li> <li style="text-align: justify;">ஆனால் செங்கற்கள் தரை அமைக்க ஏற்றவை அல்ல</li> <li style="text-align: justify;">இவை தண்ணீரை உறிஞ்சிக்கொண்டு, எளிதில் உடைந்து விடும் தன்மையுடையவை</li> <li style="text-align: justify;">இவற்றின் விளிம்புகள் நெருக்கமாகப் பொருத்தப்பட்டு, கற்களுக்கு இடையில் தரமான சிமெண்ட் பூசப்பட்டிருக்கும்</li> </ul> <p style="text-align: justify;"><strong>iii) விட்ரிபைடு கற்கள்</strong></p> <ul> <li style="text-align: justify;">இந்த வகை தரை அமைப்பு, கடினமான, தண்ணீரை உறிஞ்சாத, மேற்பரப்பில் கோடுகளுடன் கூடிய கற்களால் ஆன தரை அமைப்பாகும்</li> <li style="text-align: justify;">ஈரமற்ற, நீண்ட நாட்களுக்குத் தாங்கும் தன்மையுடைய இவ்வகை தரை அமைப்புகள் கால்நடைப் பண்ணைகளுக்கு ஏற்றவை</li> <li style="text-align: justify;">இந்த கற்கள் மணல் படுகைகளின் மீது அமைக்கப்பட்டிருக்கும்</li> <li style="text-align: justify;">கற்களுக்கு இடையிலுள்ள இடைவெளி, சிமெண்ட் பூச்சினால் இணைக்கப்பட்டிருக்கும்</li> </ul> <p style="text-align: justify;"><strong>iv) கற்கள்</strong></p> <ul> <li style="text-align: justify;">கிரானைட் கற்கள் எளிதில் கிடைக்கும் பட்சத்தில், மாட்டுப்பண்ணைகளில் தரையினை அமைக்கப் பயன்படுகின்றன</li> <li style="text-align: justify;">இந்த கற்களின் மேற்புறம் சொரசொரப்பாக்கப்பட்டு மணல் படுகையின் மீது அமைக்கப்படுகின்றன</li> <li style="text-align: justify;">இந்த வகை தரை அமைப்பு, நீண்ட நாட்களுக்கு உழைக்கக்கூடியது, மேலும் விலை மலிவானது</li> </ul> <p style="text-align: justify;"><strong>v) மணல்</strong></p> <ul> <li style="text-align: justify;">நல்ல நைசான மணல், கால்நடைப் பண்ணைகளில் தரைகளை அமைக்கப் பயன்படுத்தப்படும் மலிவான பொருளாகும்</li> <li style="text-align: justify;">மணல் தரை தண்ணீரை எளிதில் உறிஞ்சிக்கொண்டு, நீண்ட நாட்களுக்குத் தாங்குவதில்லை</li> <li style="text-align: justify;">அடிக்கடி இந்த தரை அமைப்பினை மாற்றுவதுடன், பராமரிப்பும் இவ்வகை தரை அமைப்பிற்குத் தேவைப்படும்</li> <li style="text-align: justify;">நோய் தாக்குதல்களின்போது இந்த தரை அமைப்பில் கிருமி நீக்கம் செய்ய முடியாது</li> <li style="text-align: justify;">மணல் தரை மீது சுண்ணாம்புக் கரைசல் அல்லது சாணக்கரைசலை தெளிப்பதால் இவ்வகை தரை அமைப்பினை பராமரிக்க முடியும்</li> </ul> <h3 style="text-align: justify;">கால்நடைக் கொட்டகைகளின் தரை வடிவமைப்பு</h3> <p style="text-align: justify;"><strong>அ. திடமான தரை</strong></p> <ul> <li style="text-align: justify;">திடமான தரை அமைப்பானது சிமெண்ட் கான்கிரீட், செங்கற்கள், கற்கள், மணல், ஜல்லி போன்றவைகளால் ஆன கடினமான தரை அமைப்பாகும்</li> <li style="text-align: justify;">திடமான தரை அமைப்பானது தண்ணீர் வடிவதற்கு ஏற்ற வகையில் அமைக்கப்பட்டிருக்க வேண்டும்</li> <li style="text-align: justify;">மாட்டுக் கொட்டகையில், திரவக் கழிவுகள் வெளியேறுவதற்கு ஏற்ற வகையில் கழிவு நீர் வெளியேறும் கால்வாய் 1/40 முதல் 1/60 என்ற அளவிற்கு சாய்வாக இருக்குமாறு அமைக்க வேண்டும்</li> <li style="text-align: justify;">கொட்டகையில் தண்ணீர் தேங்குவதை தவிர்ப்பதற்காக, கொட்டகையின் தரை ஈரப்பதத்தினை உறிஞ்சாத வகையில் அமைக்கப்பட்டிருக்க வேண்டும்</li> <li style="text-align: justify;">இம்மாதிரியான தரை அமைப்பில் முறையாக கொட்டகையினை சுத்தம் செய்வதும், கிருமி நாசினிகளைப் பயன்படுத்தி கிருமி நீக்கம் செய்ய வேண்டியதும் அவசியமாகும்.</li> </ul> <p style="text-align: justify;"><strong>ஆ. ஆழ்கூள தரை</strong></p> <ul> <li style="text-align: justify;">இந்த வகை தரை அமைப்பில், மாடுகள் படுப்பதற்கு ஏற்ற வகையில் ஆழ்கூளம் அடுக்குகளாக போடப்பட்டிருக்கும்</li> <li style="text-align: justify;">வைக்கோல், மரத்தூள்கள், நிலக்கடலைத் தோல் பொட்டு, காய்ந்த இலைகள் ஆழ்கூளப் பொருட்களாகப் பயன்படுத்தப்படுகின்றன</li> <li style="text-align: justify;">இந்த பொருட்களை 4-6 அங்குல உயரத்திற்கு தரையில் பரப்பி, ஒரு மாதம் முதல் ஒரு வருடம் வரை ஆழ்கூளமாகப் பயன்படுத்தலாம்</li> <li style="text-align: justify;">கால்நடைகளின் சாணம் இந்த ஆழ்கூளப் பொருட்களுடன் கலந்து நன்றாக மக்கி விடும்</li> <li style="text-align: justify;">இது தவிர காய்ந்த ஆழ்கூளப் பொருட்கள் சாணத்திலிருக்கும் ஈரத்தன்மையினை உறிஞ்சிவிடுவதால், நுண்ணுயிரிகளின் செயல்பாடு கட்டுப்படுத்தப்படுகிறது</li> <li style="text-align: justify;">ஆழ்கூளத்தில் அதிகப்படியான நுண்ணுயிரிகளின் செயல்பாட்டினை ஆழ்கூளத்தில் சுண்ணாம்பு தூளைத் தெளித்து கட்டுப்படுத்தலாம்</li> </ul> <h3>கேள்வி பதில்</h3> <p style="text-align: justify;">1. கறவை மாடுகளுக்கான கொட்டகையில் ஒரு மாட்டிற்கு தேவைப்படும் தரையளவு எவ்வளவு?</p> <p style="text-align: justify;">ஒரு மாட்டிற்க்கு சுமார் 3.5 மீ<sup>2</sup> இடம் தேவைப்படும்.</p> <p style="text-align: justify;">2. திறந்த வெளி கொட்டகை அமைப்புகளில் ஒரு கறவைமாட்டிற்க்கு தேவைப்படும் தரையளவு எவ்வளவு?</p> <p style="text-align: justify;">ஒரு மாட்டிற்க்கு சுமார் 7.0 மீ<sup>2</sup> இடம் தேவைப்படும்</p> <p style="text-align: justify;">3. எருமை மாடுகளுக்கான கொட்டகையில் ஒரு மாட்டிற்க்கு தேவைப்படும் தரையளவு எவ்வளவு?</p> <p style="text-align: justify;">ஒரு மாட்டிற்க்கு சுமார் 4.0 மீ<sup>2</sup> இடம் தேவைப்படும்.</p> <p style="text-align: justify;">4. திறந்தவெளி கொட்டகை அமைப்புகளில் ஒரு எருமை மாட்டிற்கு தேவைப்படும் தரையளவு எவ்வளவு?</p> <p style="text-align: justify;">ஒரு மாட்டிற்கு சுமார் 8.0 மீ<sup>2 </sup>இடம் தேவைப்படும்.</p> <p style="text-align: justify;">5. கறவைமாட்டு கொட்டகை அமைக்க எவ்வகை தரைகள் தரமானவகையாகும்?</p> <p style="text-align: justify;">பொதுவாக, சிமெண்ட் கான்கீரிட் தரைகள் உகந்தவை</p> <p style="text-align: justify;">ஆதாரம்: தமிழ்நாடு கால்நடை கல்லூரி மற்றும் ஆராய்ச்சி மையம்</p> </div>