<p style="text-align: justify; ">গ্ৰীষ্মকালীন শাক-পাচলি বুলিলে লাওজাতীয় পাচলি বিশেষকৈ লাও, জিকা, কোমোৰা, ভোল, তিতা কেৰেলা, ভাত কেৰেলা, চিৰাল, ধুন্দুলি আৰু কুন্দলিৰ লগতে ভেণ্ডি, তিয়ঁহ, লেচেৰা, পটল, মৰিছা আদিয়েই প্ৰধান।</p> <p style="text-align: center; "><img class="image-inline" src="https://static.vikaspedia.in/media_vikaspedia/as/images/agriculture/SashyaUtpadan/indianfreshvegetablesnamesenglishhindi.jpg" /></p> <p style="text-align: justify; ">কেইবিধমান পাচলিৰ উন্নত সঁচঃ</p> <p style="text-align: justify; ">তিয়ঁহঃ জাপানিজ লং গ্ৰীণ আৰু ষ্ট্ৰেইট এইট ভাৰতীয় কৃষি গৱেষণা পৰিষদৰ উন্নত সঁচ। তদুপৰি, পইনছেটি, বলমখীৰা আদি উল্লেখযোগ্য সঁচ।</p> <p style="text-align: justify; ">ৰঙালাওঃ লাৰ্জ ৰেড, লাৰ্জ ৰাউণ্ড, য়েল্ল’ ফ্লেছ আৰু ৰেড ফ্লেছ আদিয়েই প্ৰধান।</p> <p style="text-align: justify; ">তিতা কেৰেলাঃ পুছা ডুমেটমী আৰু পুছা বিশেষ।</p> <p style="text-align: justify; ">জিকাঃ পুছা নাচডাৰ, চুৰেনা আৰু চটপুতিষা আদি।</p> <p style="text-align: justify; ">কোমোৰাঃ সাধাৰণতে ঘূৰণীয়া আৰু থোপোকা সঁচ ব্যৱহাৰ কৰা হয়।</p> <p style="text-align: justify; ">ধুন্দুলিঃ লং গ্ৰীণ, হোৱাইট আৰু পুছা মঞ্জিৰী।</p> <p style="text-align: justify; ">ভেণ্ডিঃ পুছা ছাৱনী আৰু প্ৰভানী ক্ৰান্তি।</p> <p style="text-align: justify; ">কীট-পতংগ নিয়ন্ত্ৰণৰ বাবে প্ৰয়োজনীয় দিহাঃ</p> <p style="text-align: justify; ">পাচলি শস্য ৰোপণৰ পূৰ্বেই মাটিডোখৰ ভালদৰে চহাই লোৱা আৱশ্যক। ইয়াৰ ফলত মাটিৰ তলত আশ্ৰয় লৈ থকা লেটা স্তৰত উপনীত হোৱা কীট-পতংগক ধ্বংস কৰিব পাৰি।</p> <p style="text-align: justify; ">কীট-পতংগৰ আক্ৰমণ ৰোধ কৰিবলৈ সক্ষম জাত নিৰ্বাচন কৰি খেতি কৰা উচিত।</p> <p style="text-align: justify; ">পাচলি বাগিচাখনৰ পৰা আৰম্ভণি অৱস্থাত কীট-পতংগই আক্ৰমণ কৰা পুলিবোৰ উভালি নিৰাপদ স্থানত পুৰি বা পুতি পেলালে কীট-পতংগৰ বংশবৃদ্ধি ৰোধ হয়।</p> <p style="text-align: justify; ">পাচলি জাতীয় শস্যৰ বাবে প্ৰয়োজনীয় সাৰ-জাবৰ সঠিক মাত্ৰাত সঠিক সময়ত প্ৰয়োগ কৰিলে শস্যৰ শ্ৰীবৃদ্ধি ঘটে আৰু কীট-পতংগৰ আক্ৰমণৰ বিৰুদ্ধে উদ্ভিদজোপাই গঢ়ি তুলিবলৈ সক্ষম হয়। মাত্ৰাধিক নাইট্ৰ’জেনযুক্ত সাৰে কীট-পতংগৰ আক্ৰমণ বৃদ্ধি কৰাৰ বিপৰীতে পটাছ সাৰ প্ৰয়োগে প্ৰতিৰোধ ক্ষমতা বৃদ্ধি কৰে।</p> <p style="text-align: justify; ">শস্যাৱৰ্তনৰ যোগেদিও কীট-পতংগৰ আক্ৰমণ হ্ৰাস কৰিব পাৰি।</p> <p style="text-align: justify; ">কীট-পতংগৰ আক্ৰমণৰ প্ৰতিকাৰঃ</p> <p style="text-align: justify; ">পতংগৰ আক্ৰমণৰ পৰা সকাহ পাবলৈ-</p> <p style="text-align: justify; ">প্ৰত্যক্ষভাৱে গছৰ পৰা প্ৰাপ্তবয়স্ক পতংগ আৰু লেটা সংগ্ৰহ কৰি ধ্বংস কৰা উচিত।</p> <p style="text-align: justify; ">ভিনেগাৰ আৰু চেনি ৰসৰ মিশ্ৰণ ঘটাই বৰলীয়া পোক নিৰ্মূল কৰিব পাৰি।</p> <p style="text-align: justify; ">মাটিত বগোৱা লতাজাতীয় পাচলি (যেনে-ৰঙালাও)ক খেৰেৰে ঢাকি বৰলীয়া পোকৰ আক্ৰমণৰ পৰা ৰক্ষা কৰিব পাৰি।</p> <p style="text-align: center; "><img class="image-inline" src="https://static.vikaspedia.in/media_vikaspedia/as/images/agriculture/SashyaUtpadan/main_0.jpg" /></p> <p style="text-align: justify; ">জেং গুজি চৰাইক আকৰ্ষিত কৰি পোক-পতংগৰ অপত্য স্তৰবোৰ খাদ্যৰ ৰূপত গ্ৰহণ কৰিবলৈ সহায় কৰিও পতংগ নিয়ন্ত্ৰণৰ সহায়ক হয়।</p> <p style="text-align: justify; ">বজাৰত উপলব্ধ বিউভেৰীয়া বেচিয়ানা নামৰ ভেঁকুৰ ছটিয়াই ৰেড পাম্পকিন বিটল ধ্বংস কৰিব পাৰি।</p> <p style="text-align: justify; ">ৰেড পাম্পকিন বিটলৰ নিয়ন্ত্ৰণৰ বাবে ক্ল’ৰপাইৰিফচ এশ গ্ৰাম প্ৰতি হেক্টৰ মাটিত প্ৰয়োগ কৰা উচিত।</p> <p style="text-align: justify; ">বৰলীয়া পোকৰ বিৰুদ্ধে ২ মিঃ লিঃ মালাথিয়ন ৫০ ই চি + ১০ গ্ৰাম গুড় + ১ লিটাৰ পানীৰ দ্ৰৱণক ছটিয়াই সুফল পাব পাৰি।</p> <p style="text-align: justify; ">ৰোগৰ পৰা সকাহ পাবলৈ-</p> <p style="text-align: justify; ">প্ৰতি ১০০ গ্ৰাম বীজৰ লগত ২ গ্ৰাম ট্ৰাইক’ডাৰমা ভিৰিডি সানি শোধন কৰক।</p> <p style="text-align: justify; ">লেৰেলা ৰোগৰ বিৰুদ্ধে বায়’ফৰ পি এফ ব্যৱহাৰ কৰক।</p> <p style="text-align: justify; ">শস্যকৃমি আৰু এন্দুৰৰ পৰা সকাহ পাবলৈ-</p> <p style="text-align: justify; ">২ কিলগ্ৰাম কাৰ্বফোৰাণ প্ৰতি হেক্টৰ মাটিত, চহ কৰাৰ সময়ত ব্যৱহাৰ কৰিলে ৰুট-নট শস্যকৃমিৰ উপৰিও ভূমিজ পতংগক ধ্বংস কৰিব পাৰে। এন্দুৰৰ বিৰুদ্ধে জিংক ফছফাইডৰ টোপ ব্যৱহাৰ কৰিব পাৰি। ইয়াৰ উপৰি চাইকেলৰ টিউব পেলাই থ’লে এন্দুৰে সাপ বুলি ভয় খাই আঁতৰি যায়।</p> <p style="text-align: justify; "><strong><i>লেখকঃ ৰুদ্ৰ নাৰায়ণ বৰকাকতি</i></strong></p> <p style="text-align: justify; "><strong><i>উৎস:অসমীয়া খবৰ</i></strong></p>